ກໍ່ຜ່ານໄປແລ້ວກັບການເປີດຕົວຢ່າງເປັນທາງການຂອງ iPhone ແລະ Apple Watch ຕົວໃໝ່ ເຊີ່ງມື້ນີ້ເຮົາຈະມີສະຫຼຸບກັນວ່າມີຫຍັງແດ່. ໄອໂຟນລຸ່ນໃໝ່ມີມານຳກັນ 3 ລຸ່ນ ໄດ້ແກ່ iPhone Xs, iPhone Xs Max ແລະ iPhone XR. ນອກຈາກນີ້ກໍ່ຍັງມີ Apple Watch Series 4 ທີ່ສ້າງສຽງຮືຮາໄດ້ບໍ່ນ້ອຍກັນເລີຍ. ສະເປັກຂອງໄອໂຟນທັງສາມລຸ່ນຈະເປັນຈັ່ງໃດນັ້ນໄປເບິ່ງພ້ອມໆກັັນໄດ້.

iPhone Xs ແລະ iPhone Xs Max

iPhone Xs ເປັນ iPhone ລຸ່ນພັດທະນາຈາກ iPhone X ແລະiPhone Xs Plus ໂດຍ iPhone Xs Max ກໍ່ຄືການນຳ iPhone Xs ມາຂະຫຍາຍໜ້າຈໍໃຫ້ໃຫຍ່ຈາກ 5.8 ນິ້ວ ເປັນ 6.5 ນິ້ວ ໜ້າຈໍ OLED, Touch-sensing 120Hz ແລະ ຍັງຮອງຮັບ 3D Touch ຢູ່.

iPhone Xs ແລະ iPhone Xs Max ມີລະບົບການຈື່ໃບໜ້າ ຫຼື Face ID ທີ່ແມ່ນຍຳກວ່າເກົ່າ ແລະ ໄວຍິ່ງກວ່າເກົ່າເມື່ອທຽບກັບລຸ່ນທີ່ຜ່ານມາ ແຕ່ວ່າທີເດັດຂອງລຸ່ນນີ້ນັ້ນກໍ່ຢູ່ທີ່ຊິບປະມວນຜົນ Apple A12 Bionic.

ຊິບໃໝ່ Apple A12 Bionic

iPhone ທັງສອງລຸ່ນໃຊ້ຊິບປະມວນຜົນ Apple A12 Bionic ເຊິ່ງເປັນຊິບທີ່ຜະລິດທີ່ສະຖາປັດຕະຍະກຳ 7 ນາໂນແມັດ ຕັດໜ້າ Huawei ກາຍເປັນຊິບຕົວທຳອິດຂອງໂລກທີ່ເປັນຊິບແບບ 7 ນາໂນແມັດ (ທີ່ວາງຂາຍໃນເຄື່ອງຈີງ) ເຊິ່ງ Apple ລະບຸວ່າ Apple A12 Bionic ປະມວນຜົນໄດ້ໄວກວ່າລຸ່ນເກົ່າ 15% ໂດຍປະມວນຜົນ GPU ໄດ້ດີກວ່າເຖິງ 50% ໂດຍລວມແລ້ວປະຢັດໄຟໄດ້ດີຂື້ນ 50% ມາພ້ອມສ່ວນປະມວນຜົນແບບສະໝອງມະນຸດ (Neural Engine) 8 ແກນ ສາມາດປະມວນຜົນໄດ້ 5 ລ້ານລ້ານຄັ້ງໃນໜຶ່ງວິນາທີ ເຮັດໃຫ້ Core ML ຫຼື Machine Learning ເຮັດວຽກໄດ້ໄວກວ່າ A11 ຮອດ 9 ເທົ່າພ້ອມສ່ວນປະໃວນຜົນຮູບພາບໃໝ່ນຳ.

ເນື່ອງດ້ວຍສະເປັກທີ່ແຮງຂື້ນມາຂະໜາດນີ້ເຮັດໃຫ້ iPhone ສາມາດປະມວນຜົນ AR ໄດ້ດີຍິ່ງຂື້ນ ໂດຍ iPhone Xs ມາພ້ອມກັບ AR2 ເຊິ່ງມີການສະແດງຜົນສິ່ງຂອງທີ່ດີຂື້ນ ກວດຈັບວັດຖຸໄດ້ດີຂື້ນ ແລະ ຮອງຮັບແອັບສຳລັບວັດຄ່າແບບໃໝ່ໆຫຼາຍຂື້ນ.

iPhone Xs ຍັງເພີ່ມປະສິດທິພາບຂອງກ້ອງໃຫ້ດີຍິ່ງກວ່າເກົ່າກັບເຊນເຊີຕົວໃໝ່. ກ້ອງຫຼັງຄູ່ຄວາມລະອຽດ 12 ລ້ານພິກເຊວສອງຕົວ (ຄວາມລະອຽດເທົ່າກັບ iPhone X) ສຳລັບເລນປົກກະຕິ ເປັນເລນມຸມກວ້າງ ຮູຮັບແສງຂະໜາດ f/1.8 ແລະ ເລນທີ່ສອງສຳລັບ Zoom ຫຼື Telephoto ຮູຮັບແສງ f/2.2 (ທັງຄູ່ຮູຮັບແສງເທົ່າ iPhone X) ແຟຼສ True Tone ເອງກໍ່ຖືກພັດທະນາໃຫ້ດີຂື້ນນຳ. ສຳລັບກ້ອງໜ້າຄວາມລະອຽດ 7 ລ້ານພິກເຊວ ຮູຮັບແສງ f/2.2.

ກ້ອງຂອງ iPhone Xs ມາພ້ອມກັບ Smart HDR ເຊິ່ງໂຕເຄື່ອງຈະຖ່າຍຮູບອອກມາຫຼາຍໆຮູບ ແລ້ວເລືອກຮູບທີ່ໄດ້ລາຍລະອຽດ ເຊັ່ນ ເງົາ ແລະ ແສງ ເປັນຕົ້ນ ທີ່ດີທີ່ສຸດ ແລະ ລວມເປັນຮູບດຽວ ເຊິ່ງສື່ຕ່າງປະເທດບອກວ່າມັນມາແທນທີ່ HDR ຂອງປີທີ່ແລ້ວທີ່ເຮັດວຽກໄດ້ບໍ່ຄ່ອຍປະທັບໃຈສ່ຳໃດ.

ໂໝດຮູບຖ່າຍບຸກຄົນເອງກໍ່ຖືກພັດທະນາໄດ້ດີຍິ່ງຂື້ນຫຼັງຈາກ iPhone X ສ້າງຜົນງານຍັງບໍ່ດີຫຼາຍເທົ່າໃດ. Apple ກ່າວວ່າບໍລິສັດໄປເຮັດວຽກບ້ານມາເພີ່ມເຕີມເຮັດໃຫ້ການຖ່າຍຮູບບຸກຄົນເທິງ iPhone Xs ອອກມາດີຍິ່ງຂື້ນທັງເລື່ອງການໂຟກັສ ແລະ ການທຳໂບເກ້ອອກມາໄດ້ເປນທຳມະຊາດຫຼາຍຂື້ນ ນອກຈາກນີ້ຜູ້ໃຊ້ງານຍັງສາມາດປັບຂະໜາດຂອງຮູຮັບແສງເອງໄດ້ອີກນຳ.

ຍັງບໍ່ໝົດເທົ່ານີ້ ສຳລັບການຖ່າຍວີດີໂອນັ້ນກໍ່ຖືກອັບເກຣດເຊັ່ນດຽວກັນໂດຍ Apple ບອກວ່າມັນຄື “A new era of videography” ໂດຍ iPhone Xs ມີເຊນເຊີທີ່ໄວຂື້ນ 2 ເທົ່າ ຮອງຮັບການອັດສຽງແບບສະເຕີຣີໂອ ສາມາດຖ່າຍວີດີໂອແບບ Extended dynamic range ໄດ້ນຳ (ອາດຈະຄ້າຍເປັນການຖ່າຍວີດີໂອແບບ HDR).

ດ້ານແບັດເຕີຣີ່ Apple ເຜີຍວ່າ iPhone Xs ສາມາດໃຊ້ງານໄດ້ດົນກວ່າ iPhone X ເຄິ່ງຊົ່ວໂມງ ແຕ່ສຳລັບ iPhone Xs Max ນັ້ນສາມາດໃຊ້ງານໄດ້ດົນຂື້ນອີກ 1 ຊົ່ວໂມງ 30 ນາທີເລີຍ.

ນອກຈາກນີ້ iPhone Xs ແລະ Xs Max ຍັງປ້ອງກັນນ້ຳທີ່ລະດັບ IP68 ຫຼື ກັນນ້ຳໄດ້ລຶກຮອດ 2 ແມັດ ເຊິ່ງອັບເກຣດຈາກ iPhone X ທີ່ເປັນ IP67 ກັນນ້ຳໄດ້ແມັດດຽວ.

iPhone Xs ແລະ Xs Max ຮອງຮັບ 2 ຊີມແລ້ວ. ສຳລັບໂມເດລທົ່ວໄປຈະຮອງຮັບຊີມປົກກະຕິໜຶ່ງອັນ ແລະ eSim ອີກອັນໜຶ່ງ ແຕ່ສຳລັບໂມເດລທີ່ຂາຍໃນຈີນນັ້ນຈະຮອງຮັບຊີມແບບປົກກະຕິທັງສອງຊ່ອງເລີຍ. ສຸດທ້າຍຄືຄວາມຈຸໃໝ່ 512GB (ຄວາມຈຸນີ້ມັນລະດັບແລັບທ້ອບເລີຍນະ).

ລາຄາ ແລະ ການວາງຈຳໜ່າຍ iPhone Xs ແລະ iPhone Xs Max

ທຽບຂະໜາດຈໍ iPhone Xs, iPhone Xs Max ແລະ iPhone 8 Plus

ສຳລັບລາຄາຂອງ iPhone Xs ນັ້ນບໍ່ໄດ້ຖືກລົງຕາມລາຍງານກ່ອນໜ້ານີ້ເລີຍ ຍັງຄົງລາຄາເລີ່ມຕົ້ນທີ່ $999 ເທົ່າເກົ່າ ສຳລັບ iPhone Xs ແລະ ແພງຂື້ນໄປອີກ $1,090 ສຳລັບ iPhone Xs Max ເຊິ່ງຈະເລີ່ມຂາຍໃນປະເທດກຸ່ມທຳອິດໃນວັນທີ່ 21 ກັນຍານີ້ ແລະ ກຸ່ມທີ່ສອງ 28 ກັນຍາ.

iPhone Xs ເພີ່ມສີຄຳເຂົ້າມາ
ໃນກ່ອງ iPhone Xs ມີຫຍັງມາໃຫ້ແດ່? ໜ້າຜິດຫວັງຫຼາຍຢ່າງ ຄື ບໍ່ມີຫົວແປງຊ່ອງຫູຟັງ 3.5 mm ມາໃຫ້ແລ້ວ ແລະ ອາແດບເຕີຊາກໄຟແບບຊາກຊ້າຄືເກົ່າ

iPhone Xr

iPhone Xr ໃຊ້ການອອກແບບໜ້າຈໍແບບບໍ່ມີຂອບ ແຕ່ມີຮອຍບາດຄືກັບ iPhone X ແຕ່ປ່ຽນຈາກ OLED ເປັນ LCD ຂະໜາດ 6.1 นิ้ว ຄວາມລະອຽດ 1,792 x 828 ພິກເຊວຄວາມໜາແໜ້ນ 326 ppi ບໍ່ມີ 3D Touch ແຕ່ຮອງຮັບ True Tone Display + 120Hz Touch-sensing ແລະ ຮອງຮັບ Face ID ຄື iPhone X.

iPhone Xr ໃຊ້ຊິບປະມວນຜົນ Apple A12 Bionic ລະດັບດຽວກັບ iPhone Xs ແລະ iPhone Xs Max (ສົມພໍລາຄາແພງ).

iPhone Xr ມີກ້ອງຕົວດຽວ ແຕ່ຮອງຮັບການຖ່າຍຮູບແບບ portrait ໄດ້ນຳ ແຕ່ເປັນການປະມວນຜົນດ້ວຍຊັອບແວ ບໍ່ໄດ້ເປັນກ້ອງຄູ່ແບບ iPhone Xs.

ໃນເລື່ອງຂອງແບັດເຕີຣີ່ Apple ບໍ່ໄດ້ບອກຊັດເຈນ ແຕ່ລະບຸວ່າໃຊ້ໄດ້ດົນກວ່າ iPhone 8 Plus ຮອດ 90 ນາທີ ເຊີ່ງ iPhone 8 Plus ກໍ່ໃຊ້ໄດ້ດົນພໍສົມຄວນແລ້ວ.

iPhone Xr ກັນນ້ຳໄດ້ທີ່ລະດັບ IP67 ຫຼື 1 ແມັດ ໃນຂະນະທີ່ iPhone Xs ແລະ Xs Max ມີລະດັບ IP68 ສາມາດກັນນ້ຳໄດ້ເລິກ 2 ແມັດ.

ລາຄາຂອງ iPhone Xr

ສຳລັບ iPhone Xr ຖືກຄາດຫວັງວ່າຈະເປັນ iPhone ທີ່ມີລາຄາຖືກ ແຕ່ວ່າລາຄາເລີ່ມຕົ້ນພັດເປັນ $749 ຫຼື ປະມານ 6,3 ລ້ານກີບ ຈະເອີ້ນວ່າຖືກກໍ່ບໍ່ໄດ້. ເລີ່ມສັ່ງຈອງກ່ອນລ່ວງໜ້າໄດ້ໃນວັນທີ່ 19 ຕຸລາ, ຂາຍແທ້ ວັນທີ່ 26 ຕຸລາ ມີໃຫ້ເລືອກທັງໝົດ 6 ສີ ໄດ້ແກ່ ຂາວ, ດຳ, ແດງ, ສົ້ມ, ເຫຼືອງ ແລະ ຟ້າ.

ໃນກ່ອງບໍ່ມີຫົວແປງຊ່ອງຫູຟັງ 3.5 mm ມາໃຫ້ແລ້ວ ແລະ ອາແດບເຕີຊາກໄຟແບບຊາກຊ້າຄືເກົ່າ

 


ທີ່ມາ / ອ້າງອີງ1 / ອ້າງອີງ2

ຄວາມຄິດເຫັນ

ຄວາມຄິດເຫັນ

LEAVE A REPLY

Please enter your comment!
Please enter your name here