ແນ່ນອນວ່າການໃຊ້ງານຄອມເຮົານັ້ນດົນໆໄປມັນກໍ່ຈະຊ້າລົງໆ (ຫຼາຍໆຄົນມັກເປັນ) ແລະ ຫຼາຍໆທ່ານກໍ່ເລືອກວິທີທີ່ຈະລົງວິນໂດໃໝ່ກັນເປັນທາງເລືອກທີ່ດີທີ່ສຸດ. ຄິດວ່າຫຼາຍໆທ່ານອາດຈະຮູ້ແລ້ວເນາະກັບວິທີການຕິດຕັ້ງວິນໂດ ຫຼື ວ່າລົງວິນໂດນັ້ນເອງ ແຕ່ບາງທ່ານອາດຈະຍັງບໍ່ທັນຮູ້ເທື່ອ ສະນັ້ນແລ້ວມື້ນີ້ທາງ DoubtTech ເຮົາຈະມາສອນທຸກທ່ານໃນການດາວໂຫຼດວິນໂດ 10 ຂອງແທ້ຈາກທາງ Microsoft ກັນ ເຊິ່ງມັນຈະເປັນວິນໂດຕົວທົດລອງການໃຊ້ງານ ທີ່ສາມາດໃຊ້ໄດ້ 30 ມື້ ຫຼັງຈາກນັ້ນຖ້າທ່ານຢາກຊື້ກໍ່ສາມາດຊື້້ License ມາໃສ່ໄດ້ ຫຼື ຈະຫາວິທີ activate ແບບໃດກໍ່ແລ້ວແຕ່ທ່ານເນາະ ແຕ່ບໍ່ເນະນຳໃຫ້ໃຊ້ຂອງເຖື່ອນກັນເນາະ.

ສຳລັບທ່ານໃດທີ່ຢາກອັບເດດຈາກວິນໂດ 7 ຫຼື 8 ຫຼື XP ມາເປັນວິນໂດ 10 ຫຼື ທ່ານໃດທີ່ຊື້ຄອມໃໝ່ມາແລ້ວແຕ່ຄອມເປັນ Endless OS ຫຼື Linux ບົດຄວາມນີ້ຈະສາມາດຊ່ວຍທ່ານໄດ້ແນ່ນອນ.

ກ່ອນທີ່ຈະໄປເບິ່ງວິທີດາວໂຫຼດ ແລະ ການຕິດຕັ້ງນັ້ນເຮົາມາເບິ່ງກັນກ່ອນວ່າຄອມສະເປັກເທົ່າໃດ ແລະ ມີຫຍັງແດ່ທີ່ຈຳເປັນເພື່ອທີ່ຈະເຮັດໃຫ້ການໃຊ້ງານວິນໂດ 10 ນັ້ນສາມາດໃຊ້ໄດ້ແບບລື່ນໆກັນ.

ສະເປັກທີ່ທາງ Microsoft ແນະນຳມີດັ່ງລຸ່ມນີ້:

  • Processor (ໜ່ວຍປະມວນຜົນ): 1 GHz ຫຼື ໄວກວ່າ ຫຼື SoC
  • RAM: 1 GB ສຳລັບ 32-bit ຫຼື 2 GB ສຳລັບ 64-bit
  • Hard disk space (ໜ່ວຍຄວາມຈຳຢ່າງຕໍ່າ): 16 GB ສຳລັບ 32-bit OS ແລະ 20 GB ສຳລັບ 64-bit OS
  • Graphics card (ກາດຈໍ): DirectX 9 ຫຼື ໃໝ່ກວ່າ ພ້ອມກັບ WDDM 0 driver
  • Display (ໜ້າຈໍ): 800×600

ສະເປັກທາງເທິງນັ້ນກໍ່ຖືວ່າເປັນສະເປັກຂັ້ນຕໍ່າສຸດທີ່ຈະສາມາດໃຊ້ງານ ວິນໂດ 10 ໄດ້ ແຕ່ແອັດສິຂໍແນະນຳວ່າຖ້າຈະໃຊ້ ວິນໂດ 10 ນັ້ນສະເປັກຕ້ອງສູງກວ່ານີ້ຈະດີກວ່າ. ວ່າຕາມຈີງແລ້ວ ວິນໂດ 7 ກໍ່ຍັງຖືວ່າເປັນຕົວເລືອກອັນໜຶ່ງທີ່ດີຫຼາຍສຳລັບໃຜທີ່ມີຄອມສະເປັກຕໍ່າ ເພາະວ່າ ວິນໂດ 7 ຈະບໍ່ກິນຊັບພະຍາກອນຂອງຄອມເຮົາຫຼາຍຄື ວິນໂດ 10 ແຕ່ໃນເລື່ອງຂອງຄວາມປອດໄພແລ້ວ ວິນໂດ 10 ຖືວ່າດີທີ່ສຸດແລ້ວ ເພາະມັນຈະໄດ້ຮັບການອັບເດດຢູ່ເລື່ອຍໆ. ແລະ ໃນ ແອັດກໍ່ມີສະເປັກແນະນຳເພີ່ມຕື່ມສຳລັບຄົນທີ່ຢາກຈະອັບເດດເປັນວິນໂດ 10 ກັນວ່າຈະຕ້ອງມີສະເປັກແນວໃດດີທີ່ຈະບໍ່ເຮັດໃຫ້ການໃຊ້ງານຄອມຂອງເຮົານັ້ນເປັນໄປແບບຄໍຄວດ.

ໃນເລື່ອງຂອງໜ່ວຍປະມວນຜົນນັ້ນແນະນຳໃຫ້ໃຊ້ລຸ່ນທີ່ມີ 2 ໜ່ວຍປະມວນຜົນ (core) ແລະ ຄວາມໄວໂມງ 1.5 GHz ຂື້ນໄປ. ແຣມ ແນະນຳໃຫ້ເປັນ 2 GB ສຳລັບ 32-bit ແລະ 4 GB ສຳລັບ 64-bit ຖ້າໄດ້ 8 GB ຂື້ນໄປກໍ່່ຍິ່ງດີ ເພາະແອັດເອງກໍ່ເລີ່ມຮູ້ສຶກວ່າແຣມ 4 GB ບໍ່ຄ່ອຍພໍໃຊ້ເທົ່າໃດແລ້ວ. ໜ່ວຍຄວາມຈຳບໍ່ໃຫ້ນ້ອຍກວ່າ 20 GB ຖ້າໃຫ້ດີແນະນຳໃຫ້ໃຊ້ໜ່ວຍຄວາມຈຳແບບ SSD ເພາະຈະເຮັດໃຫ້ບັນຫາຮາດດິສໂຫຼດ 100% ນັ້ນຫຼຸດລົງ ແລະ ຈະເຮັດໃຫ້ຄວາມໄວຂອງຄອມເຮົາເພີ່ມຂື້ນອີກ. ສ່ວນເລື່ອງຂອງກາດຈໍກັບໜ້າຈໍນັ້ນຖ້າໄດ້ສູງກວ່າຂັ້ນຕໍ່າສຸດນັ້ນກໍ່ຈະດີ ແຕ່ຈະໃຊ້ແບບໃດກໍ່ໄດ້.

ແລ້ວກໍ່ມາຮອດຂັ້ນຕອນໃນການດາວໂຫຼດວິນໂດ 10 ກັນ ເຊີ່ງທ່ານສາມາດປະຕິບັດຕາມຂັ້ນຕອນດັ່ງລຸ່ມນີ້:

ໃຫ້ເຂົ້າໄປທີ່ລິ້ງ https://www.microsoft.com/en-us/software-download/windows10 ເພື່ອໄປທີ່ໜ້າດາວໂຫຼດວິນໂດ 10 ຂອງທາງ Microsoft ກັນ.

ໃຫ້ເລື່ອນລົງມາທີ່ Create Windows 10 installation media ແລ້ວກົດ  Download tool now (ຕາມຮູບ) ເພື່ອດາວໂຫຼດຕົວໂປຣແກຣມ MediaCreationTool.

ຫຼັງຈາກທີ່ທຳການດາວໂຫຼດມາຮຽບຮ້ອຍແລ້ວກໍ່ໃຫ້ເປີດໂປຣແກຣມ MediaCreationTool ຂື້ນມາ ແລ້ວປະຕິບັດຕາມຂັ້ນຕອນລຸ່ມນີ້:

ກົດ Accept ເພື່ອຍອມຮັບຂໍ້ຕົກລົງ

ແລ້ວເລືອກມາທີ່ Create installation media (USB flash drive, DVD, or ISO) for another PC ເພື່ອທີ່ຈະດາວໂຫຼດ ແລ້ວກົດ Next (ຖັດໄປ)

ຖັດມາໃຫ້ຕິກ Use the recommended options for this PC ອອກ ເພື່ອທີ່ທ່ານຈະສາມາດເລືອກຄວາມຕ້ອງການຂອງຕົວເອງໄດ້ ບໍ່ວ່າຈະເປັນພາສາ ຫຼື ເວີຊັ່ນຂອງ ວິນໂດວ່າຈະເປັນ 32-bit ຫຼື 64-bit ຫຼື ຈະເປັນທັງສອງກໍ່ໄດ້, ເຊີ່ງໃນນີ້ແອັດກໍ່ຈະເລືອກເປັນພາສາອັງກິດ ແລະ 64-bit, ປັດຈຸບັນ 32-bit ຈະບໍ່ຄ່ອຍນິຍົມໃຊ້ກັນຫຼາຍແລ້ວ, ແລ້ວກົດຖັດໄປ (Next)

ຕໍ່ມາແມ່ນໃຫ້ເລືອກວ່າທ່ານຈະດາວໂຫຼດໃສ່ USB ເລີຍ ຫຼື້ ບໍ່ ຫຼື ວ່າຈະໂຫຼດເກັບມາເປັນໄຟລ໌ ISO ເພື່ອທີ່ເຮົາຈະສາມາດເອົາມາໃຊ້ງານໄດ້ທີຫຼັງ ບໍ່ວ່າຈະເປັນ ເອົາມາໃສ່ USB ເອງ ຫຼື ອັດໃສ່ແຜ່ນ DVD ກໍ່ສາມາດເຮັດໄດ້ຄືກັນ ໃນກໍລະນີນີ້ແອັດຈະເລືອກເກັບເປັນໄຟ ISO, ແລ້ວກົດຖັດໄປ ແລ້ວເລືອກທີ່ຈັດເກັບຂອງຕົວໄຟລ໌

ທີ່ຈັດເກັບເລືອກໄດ້ຕາມໃຈ

ຕົວໂປຣແກຣມກໍ່ຈະທຳການດາວໂຫຼດວິນໂດໃຫ້ເຮົາ ຊ້າ ຫຼື ໄວ ກໍ່ຂື້ນກັບເນັດຂອງທ່ານ.

ຫຼັງຈາກທີ່ທຳການດາວໂຫຼດແລ້ວ ກໍ່ກົດໄປທີ່ Finish (ສິ້ນສຸດ) ເທົ່ານີ້ທ່ານກໍ່ໄດ້ທຳການດາວໂຫຼດ ວິນໂດ 10 ຂອງແທ້ຈາກທາງ Microsoft ມາໃຊ້ງານກັນແລ້ວ.

(ວິນໂດ 7 ກໍ່ສາມາດໂຫຼດຈາກເວັບ Microsoft ໄດ້ຄືກັນ ແຕ່ຕ້ອງໄດ້ໃຊ້ License key ຂອງຕົວວິນໂດມາໃສ່ຈຶ່ງສາມາດດາວໂຫຼດໄດ້ ຖ້າມີໂອກາດແອັດຈະມາສອນວິທີການໂຫຼດ ວິນໂດ 7 ໃຫ້)

ຕໍ່ໄປກໍ່ຈະເປັນການອັດໄຟລ໌ວິນໂດທີ່ເຮົາໂຫຼດມານັ້ນໃສ່ USB

ຖ້າທ່ານໃດເລືອກດາວໂຫຼດມາໃສ່ USB ໂດຍກົງແລ້ວກໍ່ສາມາດຂ້າມຂັ້ນຕອນນີ້ໄປໄດ້ເລີຍ.

ກ່ອນອື່ນໝົດໃຫ້ທ່ານໄປດາວໂຫຼດໂປຣແກຣມ Rufus ມາກ່ອນ ທີ່ລິ້ງ https://rufus.akeo.ie/ ຫຼື ລິ້ງກົງ https://rufus.akeo.ie/downloads/rufus-2.18.exe

ຫຼັງຈາກນັ້ນກໍ່ເປີດໂປຣແກຣມຂື້ນມາ ແລະ ສິ່ງທີ່ຂາດບໍ່ໄດ້ກໍ່ຄື USB, ແນະນຳໃຫ້ເປັນ USB ທີ່ມີຄວາມຈຸ 8 GB ແລ້ວເຮັດຕາມຂັ້ນຕອນດ້ານລຸ່ມໄດ້ເລີຍ:

ກ່ອນອື່ນກໍ່່ໃຫ້ເລືອກ USB ຂອງເຮົາໃນຊ່ອງທີ່ 1

ຊ່ອງທີ່ 2 ແມ່ນເລືອກຕາມ partition ຂອງຮາດດິສເຮົາ ເຊີ່ງຂອງແອັດກໍຈະເປັນ MPR partition, ສ່ວນຫຼາຍແລ້ວຄອມລຸ່ນໃໝ່ໃນປັດຈຸບັນກໍ່ຈະເປັນແບບ GPT partition ກັນ.

ເຮົາສາມາດກວດສອບ partition ໄດ້ຈາກການກົດ ປຸ່ມວິນໂດຢູ່ຄີບອດບວກກັບປຸ່ມ R ແລ້ວ ພີມ cmd ແລ້ວກົດ Enter ແລ້ວມັນຈະເປີດ Command Prompt ມາໃຫ້ເຮົາ

ແລ້ວພີມຄຳວ່າ diskpart ແລ້ວກົດ Enter ມັນຈະຂື້ນ command ທີ່ເປັນຂອງ diskpart ມາໃຫ້ເຮົາ

ໃຫ້ພີມຄຳວ່າ list disk ເພື່ອທີ່ຈະສະແດງລາຍການຮາດດິສຂອງເຮົາມາໃຫ້ເບິ່ງ ແລະ ຖ້າວ່າຮາດດິສຂອງເຮົາເປັນ GPT partition  ມັນກໍ່ຈະຂື້ນເປັນເຄື່ອງໝາຍ * ໃນຊ່ອງ Gpt

ແຕ່ຄອມເຄື່ອງທີ່ແອັດຈະລົງວິນໂດໃສ່ນັ້ນເປັນ MPR ສະນັ້ນແອັດຈະເລືອກເປັນ MPR.

ເມື່ອເລືອກ partition ແລ້ວແລ້ວ ໃຫ້ມາເລືອກໄຟລ໌ວິນໂດທີ່ເຮົາດາວໂຫຼດມາໄວ້ ໂດຍເລື່ອນມາທີ່ Create a bootable disk using ແລ້ວໃຫ້ເລືອກເປັນ ISO Image ແລ້ວກົດ ເລືອກໄຟລ໌ ແລ້ວໃຫ້ເລືອກໄຟລ໌ທີ່ເຮົາທຳການດາວໂຫຼດມານັ້ນໄດ້ເລີຍ

ທີ່ເຫຼືອແມ່ນປະໃຫ້ມັນເປັນຄ່າມາດຕະຖານ, ຫຼັງຈາກທີ່ເລືອກໄຟລ໌ແລ້ວກໍ່ຈະເຫັນໃນຕົວໂປຣແກຣມຂຽນເປັນ Using image: Windows.iso ຕາມຮູບ ແລ້ວກົດ Start ໄດ້ເລີຍ.

ຕົວໂປຣແກຣມຈະທຳການ format ແລະ ກັອບປີ໋ ວິນໂດທີ່ເຮົາໂຫຼດມານັ້ນໄປໃສ່ໃນ USB ຂອງເຮົາ, ຖ້າໃຫ້ມັນດຳເນີນການຈົນແລ້ວ ແລ້ວກົດປິດໄປໄດ້ເລີຍ. ພຽງເທົ່ານີ້ມັນກໍ່ພ້ອມທີ່ຈະເອົາໄປທຳການຕິດຕັ້ງໄດ້ແລ້ວ.

ຫຼັງຈາກທີ່ທຳການອັດວິນໂດໄປໃສ່ໃນ USB ເປັນທີ່ຮຽບຮ້ອຍແລ້ວກໍ່ມາຮອດຂັ້ນຕອນການລົງວິນໂດກັນ ເຊີ່ງທ່ານສາມາດເຮັດຕາມໄດ້ດ້ານລຸ່ມ:

ກ່ອນອື່ນໝົດໃຫ້ເອົາ USB ທີ່ເຮົາອັດວິນໂດໃສ່ນັ້ນໄປສຽບກັບຄອມທີ່ເຮົາຕ້ອງການຈະລົງວິນໂດ ແນະນຳວ່າຕ້ອງເປັນຊ່ອງສຽບ USB ທີ່ແໜ້ນ ແລະ ສຽບຕິດດີຈຶ້ງຈະບໍ່ເຮັດໃຫ້ມີບັນຫາໃນການລົງວິນໂດ.

ຈາກນັ້ນກໍ່ທຳການ Restart ເຄື່ອງທີ່ເຮົາຈະລົງວິນໂດ ພໍຄອມເປີດເຄື່ອງຂື້ນມາໃຫ້ກົດ F2 ເພື່ອທີ່ຈະເຂົ້າໄປຕັ້ງຄ່າໃນ Bios.

ຫຼັງຈາກເຂົ້າມາໃນ Bios ແລ້ວໃຫ້ເລືອກໄປທີ່ໜ້າຂອງ Boot ໂດຍໃຊ້ປຸ່ມລູກສອນ ຊ້າຍ ຂວາ (← →) ເທິງຄີບອດ. ແລ້ວໃນ Boot Priority ໃຫ້ເລືອກ USB ຂອງເຮົາເປັນຕົວຫຼັກ ຫຼື ຢູ່ເທິງສຸດ ໂດຍການໃຊ້ປຸ່ມ F5 & F6. ຫຼັງຈາກນັ້ນໃຫ້ກົດ F10 ແລ້ວກົດ Enter ເພື່ອບັນທຶກ ແລະ ອອກຈາກ Bios .

(Bios ຂອງຄອມແຕ່ລະເຄື່ອງອາດຈະບໍ່ຄືກັນ ໂດຍສະເພາະຄອມລຸ່ນໃໝ່ຈະຕ່າງກັນອອກໄປຫຼາຍ ແລະ ຖ້າເຮັດມົ່ວໆໄປອາດເຮັດໃຫ້ຄອມເຮົາໃຊ້ງານບໍ່ໄດ້ ເພາະສະນັ້ນຖ້າບໍ່ເຂົ້າໃຈບ່ອນໃດສາມາດສອບຖາມມາໄດ້ ແອັດພ້ອມຈະໃຫ້ຄຳປຶກສາ)

ຫຼັງຈາກທີ່ອອກມາຈາກ Bios ແລ້ວຄອມຈະທຳການ Restart ອີກຄັ້ງໜຶ່ງເຊິ່ງຕອນນີ້ຖ້າມັນເປີດຂື້ນມາແລ້ວເຫັນຂຽນວ່າ Press any key to boot from USB ແມ່ນໃຫ້ກົດປຸ່ມໃດປຸ່ມໜຶ່ງເທິງຄີບອດຂອງເຮົາ ເພື່ອທີ່ຈະ boot ເຂົ້າສູ່ໜ້າການຕິດຕັ້ງ ຫຼື ຖ້າວ່າມັນ Boot ຂື້ນມາເປັນຮູບໂລໂກຂອງວິນໂດ 10 ເລີຍກໍ່ປະມັນໄປໃຫ້ມັນ Boot ເຂົ້າໜ້າການຕິດຕັ້ງ.

ເຂົ້າມາໜ້າທຳອິດຂອງການຕິດຕັ້ງວິນໂດ ໃຫ້ທ່ານເລືອກພາສາ, ເວລາ ແລະ ຄີບອດໄດ້ຕາມຕ້ອງການເລີຍ ແລ້ວກົດ Next

(ຮູບຈະບໍ່ຊັດເຈນເພາະຖ່າຍມາຈາກໜ້າຈໍຄອມ)

ຕໍ່ໄປໃຫ້ກົດ Install now

ຕໍ່ໄປຈະເປັນການໃສ່ License key ຖ້າວ່າຄອມໃຊ້ວິນໂດແທ້ຢູ່ແລ້ວ ມັນຈະບໍ່ຖາມຫາໃນຂັ້ນຕອນນີ້ ແລະ ບໍ່ໄດ້ເລືອກໃນຂັ້ນຕອນຕໍ່ໄປ.

ຖ້າເຮົາບໍ່ມີ License key ກໍ່ໃຫ້ກົດໄປທີ່ I don’t have a product key

ຫຼັງຈາກນັ້ນໃຫ້ມາເລືອກເວີຊັ່ນຂອງວິນໂດ ຊິ່ງແອັດແນະນຳໃຫ້ເລືອກເປັນ Windows 10 Pro ເພື່ອທີ່ຈະສາມາດໃຊ້ງານທຸກຄຸນສົມບັດໄດ້

ຕໍ່ໄປ ກົດຕິກທີ່ I accept the license terms ແລ້ວກົດ Next

ແລ້ວໃຫ້ເລືອກ Custom: Install windows only (advance)

ຕໍ່ມາຄືການເລືອກຊ່ອງທີ່ເກັບຂໍ້ມູນທີ່ຈະທຳການລົງວິນໂດ, ໃຫ້ເລືອກໄປທີ່ທ່ານຈະລົງວິນໂດ ເຊີ່ງຂອງແອັດກໍ່ຈະເປັນ SSD 120GB ແລ້ວກົດ Format ເພື່ອຈະທຳການລົບຂໍ້ມູນທັງໝົດໃນຊ່ອງນັ້ນອອກໄປ ແລ້ວກົດ Next

ຫຼັງຈາກນັ້ນວິນໂດກໍ່ຈະທຳການຕິດຕັ້ງ. ຖ້າໃຫ້ມັນຕິດຕັ້ງແລ້ວໆ ມັນກໍ່ຈະ Restart ໃຫ້ເຮົາ.

ກ່ອນທີ່ຄອມເຮົາເປີດເຄື່ອງຂື້ນມາໃໝ່ນັ້ນ, ຖ້າວ່າຕອນທຳອິດທີ່ທ່ານລົງວິນໂດແລ້ວມັນຂື້ນ Press any key to boot from USB ທ່ານກໍ່ປະໃຫ້ມັນເປີກຂື້ນມາເລີຍໂດຍບໍ່ຕ້ອງກົດຫຍັງ ແລ້ວໄປທີ່ຂັ້ນຕອນຕໍ່ໄປໄດ້ເລີຍ, ແຕ່ຖ້າວ່າຄອມຂອງທ່ານ Boot ເຂົ້າໜ້າການຕິດຕັ້ງອັດຕະໂນມັດໂດຍທີ່ທ່ານບໍ່ໄດ້ກົດປຸ່ມຫຍັງຕອນທຳອິດນັ້ນ ໃຫ້ທ່ານທຳການດຶງຕົວ USB ອອກເພື່ອບໍ່ໃຫ້ມັນ boot ເຂົ້າໜ້າການຕິດຕັ້ງຕັ້ງແຕ່ເລີ່ມຕົ້ນ. ພໍມັນ boot ຂື້ນໂລໂກຂອງວິນໂດແລ້ວ ກໍ່ໃຫ້ທ່ານທຳການສຽບ USB ກັບເຂົ້າໄປອີກ. ເຊີ່ງມັນກໍ່ຈະທຳການ Restart ອີກຄັ້ງໜຶ່ງຫຼັງຈາກນັ້ນ ໃຫ້ທ່ານປະຕິບັດຄືເກົ່າ.

ເຊິ່ງຖ້າການຕິດຕັ້ງສຳເລັດຕົວວິນໂດກໍ່ຈະທຳການ boot ຂື້ນແບບປົກກະຕິ ແລະ ຈະມີການຕັ້ງຄ່າຕອນເປີດເຄື່ອງໃໝ່ໆ ເຊິ່ງສາມາດເຮັດໄດ້ດັ່ງນີ້:

ເລືອກທີ່ຕັ້ງຂອງເຮົາ, ແອັດເລືອກເປັນ Laos

ຕໍ່ມາຄືການເລືອກຄີບອດ ເຊີ່ງແອັດຈະເລືອກເປັນ US

ຕໍ່ໄປກໍ່ກົດ Skip ຫຼື ຈະກົດ Add layout ເພື່ອເພີ່ມຕື່ມກໍ່ໄດ້ (ສາມາດເພີ່ມໄດ້ທີຫຼັງ)

ຕໍ່ໄປຄືການເຊື່ອມຕໍ່ກັບອິນເຕີເນັດ ຖ້າທ່ານບໍ່ມີອິນເຕີເນັດກໍ່ກົດ Skip for now ໄປ, ແຕ່ຖ້າມີ ກໍ່ໃຫ້ເຊື່ອມຕໍ່ ແລ້ວກົດ Next

ຕໍ່ໄປໃຫ້ທ່ານເລືອກວ່າຈະໃຊ້ເປັນການສ່ວນໂຕ ຫຼື ໃນອົງກອນ ຫຼື ບໍລິສັດ, ເຊີ່ງແອັດກໍ່ຈະເລືອກເປັນ ການສ່ວນໂຕ ແລ້ວກົດ Next

ຕໍ່ໄປຄືການເຂົ້າລະບົບຂອງທາງ Microsoft ເຊີ່ງເຮົາກໍ່ຈະເລືອກເປັນ Offline account ໄປ, ຫຼື ຖ້າທ່ານຢາກເຂົ້າໃຊ້ງານກໍ່ສາມາດເຂົ້າລະບົບໄດ້.

ຕໍ່ໄປໃຫ້ກົດໄປທີ່ No

ຕໍ່ໄປໃຫ້ທ່ານໃສ່ຊື່ ແລ້ວກົດ Next,ສ່ວນລະຫັດຜ່ານຂື້ນກັບວ່າທ່ານຊິໃສ່ ຫຼື ບໍໍ, ຖ້າບໍ່ໃສ່ກໍ່ກົດ Next ໄປໄດ້ເລີຍ.

ຕໍ່ໄປຄືການເລືອກຄວາມເປັນສ່ວນຕົວຂອງຄອມ ໃຫ້ທ່ານເລືອກປິດໄປໃຫ້ໝົດເພື່ອທີ່ຈະເຮັດໃຫ້ຄອມເຮົາໄວຂື້ນ, ຫຼື ຈະເລືອກເປີດໝົດເລີຍກໍ່ໄດ້ຄືກັນ

ຕໍ່ໄປຕົວວິນໂດຈະກຽມການໃຫ້ພ້ອມໃຊ້ງານ ເຊີ່ງຈະໃຊ້ເວລາໜ່ອຍໜຶ່ງໃຫ້ທ່ານລໍຖ້າຈັກໜ່ອຍ ແລ້ວມັນຈະເປີດເຂົ້າໜ້າ Desktop ໃຫ້ເຮົາເອງ.

ພຽງເທົ່ານີ້ທ່ານກໍ່ມີວິນໂດແທ້ຂອງຈາກທາງ Microsoft ມາໃຊ້ແບບຟຣີໆກັນ 30 ມື້ກັນແລ້ວ ເຊີ່ງທ່ານສາມາດຊື້ສາມາດຊື້ຕົວລາຍເຊັນຂອງແທ້ມາໃຫ້ໄດ້ ຫຼື ຈະໃຊ້ Activate ເຖື່ອນກໍ່ແລ້ວແຕ່ທ່ານເນາະ.

ອະນາຄົດທາງ Microsoft ອາດຈະມີການປ່ຽນແປງການດາວໂຫຼດນີ້ກໍ່ເປັນໄດ້ ສະນັ້ນຮີບໄປໂຫຼດເກັບມ້ຽນກັນໄດ້ເລີຍ.

ອາດຈະມບາງຂັ້ນຕອນທີ່ຊັບຊ້ອນ ແລະ ເຮັດໃຫ້ທ່ານສັບສົນ ຫຼື ບາງຂັ້ນຕອນອາດຈະບໍ່ຄົບດີປານໃດ ກໍ່ຕ້ອງຂໍໂທດຂໍອະໄພນຳ ຖ້າວ່າທ່ານໃດບໍ່ເຂົ້າໃຈບ່ອນໃດ ຫຼື ມາຫຍັງຢາກສອບຖາມ ສາມາດມາຄອມເມັ້ນສອບຖາມໄດ້ ຫຼື ຈະ ທັກມາທາງເພຈກໍ່ໄດ້ ແລ້ວແອັດຈະພະຍາຍາມມາຕອບໃຫ້.

ແລ້ວພົບກັນອີກ ກັບ DoubtTech’s Tips ເຊີ່ງມື້ໜ້າຈະມີຫຍັງມາຝາກກໍ່ສາມາດຕິດຕາມກັນໄດ້.

ຄວາມຄິດເຫັນ

ຄວາມຄິດເຫັນ

LEAVE A REPLY

Please enter your comment!
Please enter your name here