ສຳລັບຜູ້ໃຊ້ງານລະດັບສູງທີ່ຕ້ອງການໜ່ວຍປະມວນຜົນແຮງໆ ແບບຊີຣີ່ Xeon ໄດ້ເວລາກຽມການອັບເກຣດເຄື່ອງກັນແລ້ວ ກັບການເຜີຍຂໍ້ມູນຫຼ້າສຸດຂອງໜ່ວຍປະມວນຜົນສະຖາປັດຕະຍະກຳ ‘Ice Lake Xeon’ ທີ່ມາພ້ອມກັບຂະບວນການຜະລິດທີ່ລະດັບ 10 nm ເຊີ່ງຈະມາພ້ອມກັບແພຼດຟອມໃໝ່ Socket LGA 4189 ຮອງຮັບໜ່ວຍຄວາມຈຳແບບ 8-Channel Memory ແລະ ອັດຕາການຄາຍຄວາມຮ້ອນສູງສຸດທີ່ 230 W TDP ໂດຍການວາງຈຳໜ່າຍນັ້ນຈະຢູ່ໃນຊ່ວງປີ 2018–2019 ນີ້.

ສິ່ງໜຶ່ງເລີຍທີ່ທ່ານຕ້ອງປ່ຽນຄວບຄູ່ກັບການປ່ຽນໜ່ວຍປະມວນຜົນສະຖາປັດຕະຍະກຳ ‘Ice Lake Xeon’ ໃໝ່ນີ້ກໍ່ຄືເມັນບອດເນື່ອງຈາກວ່າທາງ Intel ໄດ້ປ່ຽນມາໃຊ້ແພຼດຟອມໃໝ່ Socket LGA 4189 ຈາກເດີມທີ່ໜ່ວຍປະມວນຜົນສະຖາປັດຕະຍະກຳຊີຣີ່ Skylake ນັ້ນໃຊ້ແພຼຼດຟອມ Socket LGA 3647 (ແຕ່ຕາມຂໍ້ມູນນັ້ນບອກເອົາໄວ້ວ່າສາມາດທີ່ຈະໃຊ້ Adapter ໄດ້ ແຕ່ວ່າ Adapter ນັ້ນຈະຖູກໃຊ້ໃນການເພີ່ມພະລັງງານໄຟຟ້າໃຫ້ກັບຕົວໜ່ວຍປະມວນຜົນບໍ່ສາມາດທີ່ຈະໃຊ້ຂ້າມແພຼດຟອມກັນໄດ້) ເຊິ່ງຈາກຂະໜາດ Socket ໃໝ່ນັ້ນເຮັດໃຫ້ໜ່ວຍປະມວນຜົນສະຖາປັດຕະຍະກຳ ‘Ice Lake Xeon’ ກາຍເປັນໜ່ວຍປະມວນຜົນທີ່ມາພ້ອມກັບຂະໜາດ Socket ໃຫຍ່ທີ່ສຸດຍິ່ງກວ່າ AMD Ryzen Threadripper ອີກ.

ໃນສ່ວນຂອງອັດຕາການຄາຍຄວາມຮ້ອນນັ້ນໜ່ວຍປະມວນຜົນສະຖາປັດຕະຍະກຳ ‘Ice Lake Xeon’ ຈະຢູ່ທີ່ປະມານ 230 W TDP ເຊີ່ງຖືໄດ້ວ່າຫຼາຍກວ່າໜ່ວຍປະມວນຜົນ Xeon ໃນລຸ່ນ Skylake ໃນສ່ວນນີ້ນັ້ນກໍ່ເນື່ອງຈາກວ່າໜ່ວຍປະມວນຜົນສະຖາປັດຕະຍະກຳ ‘Ice Lake Xeon’ ຈະມາພ້ອມກັບຈຳນວນແກນການປະມວນຜົນທີ່ຫຼາຍກວ່າເກົ່າ ແລະ ຄວາມໄວສັນຍານໂມງເລີ່ມຕົ້ນກໍ່ຫຼາຍກວ່າເກົ່າເຊັ່ນດຽວກັນ.

ທາງດ້ານໜ່ວຍຄວາມຈຳນັ້ນໜ່ວຍປະມວນຜົນສະຖາປັດຕະຍະກຳ ‘Ice Lake Xeon’ ຈະຮອງຮັບໜ່ວຍຄວາມຈຳແບບ 8-Channel Memory ເຊິ່ງເທິງຕົວເມັນບອດນັ້ນຈະມາພ້ອມກັບ slot ໜ່ວຍຄວາມຈຳສູງສຸດທີ່ 16 slot ເຮັດໃຫ້ຜູ້ໃຊ້ສາມາດທີ່ຈະເພີ່ມໜ່ວຍຄວາມຈຳແບບ DDR4  ຄວາມໄວ 2933 MHz ສູງສຸດທີ່ 1 TB ເລີຍ. ຢ່າງໃດກໍ່ຕາມແຕ່ຕ້ອງຖ້າເບິ່ງໃນສ່ວນຂອງລາຄາ ແລະ ມື້ວາງຈຳໜ່າຍຢ່າງເປັນທາງການຈາກ Intel ອີກເທື່ອໜຶ່ງ.


ອ້າງອີງ wccftech, notebookspec

ຄວາມຄິດເຫັນ

ຄວາມຄິດເຫັນ

LEAVE A REPLY

Please enter your comment!
Please enter your name here